Ես Գայանե Մելքումյանն եմ: Հեռուստահաղորդավար ու լրագրող դառնալու ցանկությունս մեծ էր: Դեռ մանկուց էի երազում այս ամենի մասին: Հեռուստատեսային աշխատանքին սիրահարվեցի` էկրանին տեսնելով լրատվականի հաղորդավարներին: Մասնագիտությամբ լրագրող եմ: Արդեն 3 տարի է, ինչ աշխատում եմ Արցախի Հանրային հեռուստատեսությունում: Սկզբում ցանկանում էի աշխատել լուրերի բաժնում` որպես լրատվականի հաղորդավար: Սակայն ժամանակի ընթացքում հասկացա, որ հեղինակային հաղորդաշար ունենալն առավել հետաքրքիր է: Աշխատանքս սկսեցի զանազան թեմաներով տեսանյութերի պատրարստմամբ եւ այդ ամենն ամբողջացվում էր մեկ ծրագրում: Հեռուստատեսային աշխատանքը, իսկապես, տարբերվում է մնացած բոլոր ոլորտի աշխատանքներից: Էկրանը մեզ հնարավորություն տվեց ինքնադրսեւորվելու եւ առավել վստահ լինելու ցանկացած հարցում: Հեռուստաէկրանը սիրում է անկեղծությունը եւ անկեղծ ու սիրով կատարած աշխատանքն է հետագա իմ հաջողությունների երաշխիքը լինելու:
